Job 29

Ayubu Anamaliza Utetezi Wake

1 ^aAyubu akaendelea na hoja yake, akasema:
2 ^b“Tazama jinsi ninavyoitamani miezi iliyopita,
zile siku ambazo Mungu alikuwa akinilinda,

3 ^cwakati taa yake iliniangazia kichwani changu,
na kwa mwanga wake Mungu nikapita katikati ya giza!

4 ^dNatamani siku zile nilizokuwa katika ustawi wangu,
wakati urafiki wa Mungu wa ndani ulipoibariki nyumba yangu,

5 ^ewakati Mwenyezi alikuwa pamoja nami,
nao watoto wangu walikuwa wamenizunguka,

6 ^fwakati njia yangu ilikuwa imenyweshewa siagi,
nao mwamba ukanimiminia vijito vya mafuta ya zeituni.

7 ^g“Wakati nilipokwenda kwenye lango la mji
na kuketi katika kiwanja,

8 ^hvijana waliniona wakakaa kando,
nao wazee walioketi wakasimama;

9 ⁱwakuu wakaacha kuzungumza
na kuziba vinywa vyao kwa mikono yao;

10 ^jwenye vyeo wakanyamazishwa,
nazo ndimi zao zikagandamana na makaakaa ya vinywa vyao.

11 ^kYeyote aliyenisikia alinena mema juu yangu,
nao walioniona walinisifu,

12 ^lkwa sababu nilimwokoa maskini aliyeomba msaada,
naye yatima aliyekuwa hana wa kumsaidia.

13 ^mMtu aliyekuwa karibu kufa alinibariki,
nami niliufanya moyo wa mjane kuimba.

14 ⁿNiliivaa haki kama vazi langu;
uadilifu ulikuwa joho langu na kilemba changu.

15 ^oNilikuwa macho ya kipofu
na miguu kwa kiwete.

16 ^pNilikuwa baba kwa mhitaji;
nilimtetea mgeni.

17 ^qNiliyavunja meno makali ya waovu,
na kuwapokonya wahanga kwenye meno yao.

18 ^r“Nikafikiri, ‘Nitafia katika nyumba yangu mwenyewe,
nazo siku zangu zitakuwa nyingi kama chembechembe za mchanga.

19 ^sMizizi yangu itafika mpaka kwenye maji,
nao umande utakaa juu ya matawi yangu usiku kucha.

20 ^tUtukufu wangu utabakia kuwa mpya ndani yangu,
upinde wangu daima utaendelea kuwa mpya mkononi mwangu.’

21 ^u“Watu walinisikiliza kwa tumaini,
wakingojea ushauri wangu kwa utulivu.

22 ^vBaada ya mimi kuzungumza, hawakusema zaidi;
maneno yangu yaliingia masikioni mwao kwa makini.

23 Waliningojea kama manyunyu ya mvua
na kuyapokea maneno yangu
kama ardhi inyonyavyo mvua ya vuli.

24 Walipokata tamaa niliwaonyesha uso wa furaha;
nuru ya uso wangu ilikuwa ya thamani kwao.

25 ^wNiliwachagulia njia na kukaa kama mkuu wao;
niliishi kama mfalme katikati ya majeshi yake;
nikawa kama yeye anayewafariji waombolezaji.